Job ar Baion Joakim Gwilhom Yann-Bêr Kalloc'h Sketchoù ar c'hlass Barzhoniezh

Job ar Baion

Job ar Baion a zo ganet e Pluwigner e 1876. Skrivet en deus pezhioù-c'hoari poblel e penn kentañ an ugentved kantvlead e Bro-Gwened. Teatr Nikolazig Santes-Anna ne oa ket unan ag ar re-vihannañ. Soñjit 'ta ! Teir leurenn e-lec'h ma vese possubl c'hoari ged 200 den. 2500 plass ewid an arwestourion ! Na mui na mes. Ha tud é chom er-maes c'hoazh !

Lodenn III, Divis II : Nikolasig, ar pelikard, lesulit, ar person, an Aotrou Garo.

Al labourision	Dewezh mad deoc'h, tudchentil.
Ar person	Petra zo c'hoazh a-newez genoc'h e keranna ?
Ar pelikard	Lod-kaer a draoù, Aotrou person.
Ar person	Moarhad hoc'h eus gwelet ho santes c'hoazh, Ivon Nikolasig ?
Nikolasig	Ya, aotrou person.
Ar person	Mat. (D'an aotroù Garo, a-gostez.) N'eus ket mui moian da denniñ an traoù-se ag e benn. (d'ar re -all, kreñv.) Med, na c'hwi, perag e oc'h-c'hwi daet amañ, mar plij genoc'h ?
Ar Rous	Aotrou person, gwelet hon eus-ni mat ive, àr un dro ged Ivon a zo amañ ...
Ar person	Lârit din ar pezh ho peus gwelet.
Ar Rous	C'hwec'h e oamp, ha nompas unan.
Nikolasig	Setu : tregasset bras e oan, rag me soñje : "an Aotrou person sur a-walc'h 'n em c'hredo ket james - na boud ema gwir ar pezh a lâran - mard on ma huanan hebkén e weled ar Santes. Gwir eo ema diaes da grediñ he deus Santes-Anna en em ziskouezet din-me vel-se, rag ur paourkaezh den on, na oui na skriv na lenn. Ha diryaou ne harzen ket mui ged ar soñ-se.
Ar pelikard	Paour kaezh !
Nikolasig	Krediñ a raen e oan daet da voud foll. O ma mestres-vad, am boa lâret da Santes-Anna, ewid ma kredo an dud ennoc'h, gwrait ive ma welint ! Gwrait enta ur mirakl ewid diskoueziñ d'an oll ho polontez. Krediñ a raont oll eh on-me foll.
Garo	Hama ?
Nikolasig	Ma mestres vad a c'hrataas din neuse ur merk ewid disoloiñ d'an oll he bolontez.
Ar Rous	Ha daet eo ar merk !
Ar re-all	Rac'h hon eus eñv gwelet.
Ar pelikard	Netra kaerroc'h !
Lesulit	An neñv war an douar diskennet.
Ar person	Marse 'walc'h, mes añfin, pessort traoù hoc'h eus-c'hwi gwelet vel-se ?
Lesulit	Traoù kàer nad int ket bet gwelet biskoazh ged den ebed war an douar !
Ar person	Mes lâret ta !
Ar Rous	Hama, setu, boud e oa dec'h ...
Lesulit	Ya, an neizhour.
Ar rous	Ya, boud e oa an nezihour. Filaj en hon ti-ni. Waet e oan-me er-maes da zistagiñ ar c'hi war-dro unneg eur. Ne oa ket mui bodet en-dro d'an tan namaed ar re ag an ti.
Nikolasig	Sklaer e oa an nos ; me wele ar stered ... Ewid gortos ma vehe bet daet ar c'housked din da ankouaad ma nec'hañs, em boa en em lakaet da bediñ. Ar c'housked ne zae ket, kàer em boa henn goulenn. War-dro kreisnos, me a wel er gambr ur splannder gwenn hag a luc'h vel argant. Me da soñjal neuse : "Setu ma mestres vad ! Ya, sur a-walc'h, hi eo. Faotiñ a ra dezhi marse ma c'hoñfortiñ, pe ma gourdrous ...!" Mes pas ! Ar wezh-se ne oa ket he soñj na reiñ konfort na gourdrous tamm ebed. Med ged he mouezh doussañ hag ur minc'hoarzh : "Yvon, emezi, ewid lakaad ar person da grediñ, hag ar pennoù kaled arall mard ive, kerzhit a-benn, mar plij genoc'h, da glask ho amied. Tuchant a splanno ur c'houlaouenn diragzoc'h. Heuliit hi beteg ar lec'h ma ho kasso."
Ar pelikard	Rekis e oa kavoud testoù, kompren a rit.
Nikolasig	Ya, moned a ran d'o c'hlask, hag ar c'hentañ kavet zo ma breureg Loeis.
Ar Rous	Waet 'oan, me lâr deoc'h, da zistagiñ ar c'hi ; ne soñjen ket pelloc'h. En un taol, me a wel ma breureg. "Deus, a lâr eñv. - Da venn, a lâran-me ? - Deus ataw ha daes buan. Setu ni é redeg d'un tu ha d'an tu-all hon daou, a di da di, ewid dihuniñ ar re-all.
Garo	Perag e oc'h-c'hwi waet da zic'housk ar re-mañ kentoc'h ...
Ar person	Ya, kentoc'h ewid an dud arall a Geranna ?
Ar pelikard	Dam, tudchentil, ni eo an ameseion tostañ.
Garo	Ya, ameseion hag amied ive, ar re wellañ.
Ar person	(Da Nikolasig) Tud prest-kàer d'ho krediñ ha da lâred veldoc'h.
Lesulit	Dam feiz, Aotrou person, pas sur : prest-kaer kentoc'h da grediñ en devoa Ivon hanter gollet e benn.
Ar rous	Felliñ a rae dezhoñ gwerzhiñ rac'h an dachenn en deus e Plunered, ewid sevel, e hunan, ar chapel ... Kement-se hon lakae-ni gwall glañv !
Nikolasig	Kentizh ma oamp bet rac'h tolpet, setu, ni é weled ur piled berr ha téw diragzomp, é sevel hag é kerzhed... Ha d'e heul.
Lesulit	Na pegen kreñv e skoe hor c'halonoù en hor c'hreis, tra ma oamp é tiskenn an ivarc'h don, en ur heuli ar c'houlaouenn!
Ar pelikard	Krediñ a raemp gwelet diragzomp ar sterenn en devoa hambrouget ar vugulion beteg ar chraou a Vetleem.
Ar Rous	Me a soñje-me : "Ma doue, perag e omp bet ni choaset ?"
Lesulit	Me, me a lâre : "ar Messi a faot dezhoñ diskenn e-mesk ar Vretoned !".
Nikolasig	E penn an niwarzh don e welomp ar piled é sevel just a-dreist ar gloued hag é voned e park ar Bossennoù. Hag er lec'h mand oa Mark Ardeven torret e arar dec'h, eñv a chom heb bouljal, vel e-pign douzh ur barr. En un taol, ni henn gwel é tiskenn beteg an douar, é sevel, é tiskenn en-dro, teir gwezh vel-se. Kent disparissiñ en douar en tachad-se. Lakaet em boa ma zroad war ar lec'h, tra ma oa waet ma breureg Loeis da glask ur bigell : "Toull ase", a lâran-me dezhoñ pa oa arruet en-dro".
Ar rous	Feiz ya, setu, me a grog em benweg, me a sko un taol ; ar geot a za genin. An deirvet gwezh, me a glew an douar é tassoniñ hag é c'hober an trous a ra an houarn é skoiñ war un tamm koad bennag.
Nikolasig	Hag un tammig war-lec'h, en toull digor ha don - o mirakl ! - ni a wel diragzomp delwenn ma mestres, endouaret ase a-c'houde an amzer gozh.